Exo 20 | NdeIBE | STEP | UNkulunkulu wakhuluma amazwi wonke la wathi:

Exodus 20

Imilayo elitshumi

1 UNkulunkulu wakhuluma amazwi wonke la wathi:

2 “NginguJehova uNkulunkulu wakho owakukhupha ebugqilini bakho eGibhithe.

3 “Ungabi labanye onkulunkulu ngaphandle kwami.

4 “Ungazenzeli izithombe ezifana lezinto ezisezulwini kumbe phansi emhlabeni kumbe ngaphansi kwamanzi.

5 Ungakhothameli izithombe, njalo ungazikhonzi. Ngoba mina Jehova uNkulunkulu wakho nginguNkulunkulu olobukhwele, ojezisa abantwana ngenxa yezono zaboyise kuze kube yisizukulwane sesithathu lesesine salabo abangizondayo,

6 kodwa ngilothando olungapheliyo ezizukulwaneni zabangithandayo begcina imithetho yami.

7 “Ungaliphathi ngeze igama likaJehova uNkulunkulu wakho ngoba uJehova kasoze amxolele wonke oliphatha ngeze igama lakhe.

8 “Khumbula usuku lweSabatha ulugcine lungcwele. 9 Uzasebenza izinsuku eziyisithupha uwenze wonke umsebenzi wakho, 10 kodwa ilanga lesikhombisa liyiSabatha likaJehova uNkulunkulu wakho. Ngalolosuku ungaphathi msebenzi loba ungonjani, wena lendodana yakho, lendodakazi yakho, lesisebenzi sakho – esesilisa lesesifazana, ngitsho lezifuyo zakho loba isihambi esikwethekeleyo emzini wakho. 11 Ngoba ngezizinsuku eziyisikhombisa uJehova wenza amazulu lomhlaba lakho konke okukukho, kodwa ngosuku lwesikhombisa waphumula. Ngakhoke walubusisa usuku lweSabatha walwenza lwaba ngcwele.

12 “Hlonipha uyihlo lonyoko ukuze impilo yakho ibende elizweni akunika lona uJehova uNkulunkulu wakho.

13 “Ungabulali.

14 “Ungafebi.

15 “Ungebi.

16 “Ungafakazi amanga ngomakhelwane wakho.

17 “Ungahawukeli indlu kamakhelwane wakho. Ungahawukeli umfazi kamakhelwane wakho, loba isisebenzi sakhe sesilisa loba esesifazana, lenkabi yakhe, lobabhemi wakhe loba yini ekamakhelwane wakho.”

18 Kwathi abantu besizwa umdumo bebona njalo besizwa icilongo, njalo bebona intaba ithunqa intuthu, bathuthumela ngokwesaba. Bema khatshana, 19 bathi kuMosi, “Khuluma kithi wena sizalalela. Kodwa uNkulunkulu kangakhulumi kithi yena ngokwakhe ngoba singafa.”

20 UMosi wathi, “Lingesabi, uNkulunkulu uzelilinga ukuze limesabe lokuze lingoni.”

21 Abantu basala belokhu bemi bucwadlanyana, uMosi wangena phakathi komnyama waya lapho okwakuloNkulunkulu khona.

Izithombe lama-alithare

22 UJehova wathi kuMosi, “Tshela abantu bako-Israyeli uthi, ‘Lizibonele lina ngokwenu ukuthi ngikhulume lani ngisezulwini. 23 Lingenzi onkulunkulu ukuba babekhona kanye lami. Lingazenzeli onkulunkulu besiliva kumbe onkulunkulu begolide.

24 “ ‘Ngakheleni i-alithare ngomhlabathi lenzele kulo umhlatshelo womnikelo wokutshiswa, leminikelo yobudlelwano, izimvu lezimbuzi kanye lezinkomo zenu. Loba kungaphi lapho engizakwenza ibizo lami lihlonitshwe, khona, ngizakuza kini ngilibusise.

25 Uma lingakhela i-alithare ngamatshe, lingaze lawabaza lawomatshe ngoba lizalingcolisa nxa lingasebenzisa okokubaza kulo. 26 Lingaze laya e-alithareni lami ngezikhwelo funa ubunqunu benu bambulwe khona lapho.’